Лінкі ўнівэрсальнага доступу

Адамовіч, Быкаў і Барадулін былі за бел-чырвона-белы сьцяг і Пагоню


Алесь Адамовіч і Васіль Быкаў

Лукашэнка ў Хатыні чарговы раз заявіў, што нібыта пад бел-чырвона-белым сьцягам праводзіўся генацыд беларускага народа.

Праўда, гэтым разам не прагучала фраза «пад гэтым сьцягам расстрэльвалі» — бо, нягледзячы на актыўныя намаганьні праўладных гісторыкаў, адшукаць факты расстрэлаў пад бел-чырвона-белым сьцягам не ўдалося.

А не ўдалося таму, што іх не было. А вось пад чырвонай зоркай на фуражках энкавэдыстаў — так, расстрэльвалі, у Курапатах і ня толькі, і якраз гэта і набыло маштаб сапраўднага генацыду беларускага народу.

Увосень 1991 году, пасьля таго, як Пагоня і бел-чырвона-белы сьцяг атрымалі статус дзяржаўных сымбаляў, мне, у той час дэпутату Апазыцыі БНФ у Вярхоўным Савеце, вэтэран вайны з нацызмам, двойчы паранены і ўзнагароджаны баявымі ордэнамі, перадаў ліст з заклікам прыняць у якасьці дзяржаўнага гімну песьню «Мы выйдзем шчыльнымі радамі».

Пачынаўся той ліст гэтак: «Агульнавядома, што без нацыянальнай сымболікі немагчыма пасьпяховае ажыцьцяўленьне высакароднай ідэі самавызначэньня народу. Выдатна, што што Вярхоўны Савет Рэспублікі Беларусь нарэшце зразумеў важнасьць у гэтай справе нацыянальна-гістарычнага падыходу, і народу вернуты ягоны старажытны сьцяг і старажытны герб».

Звалі гэтага вэтэрана Васіль Быкаў. Разам зь ім ліст падпісалі сын забітага нацыстамі партызана Рыгор Барадулін і былы баец партызанскай брыгады Алесь Адамовіч.

У сваёй прамове Лукашэнка ўжыў словы «Ідзі і глядзі!» Гэтак называўся фільм, зьняты па творах Алеся Адамовіча, які ў свой час прайшоў па кінаэкранах усяго сьвету. Сёньня ўвесь сьвет глядзіць на беззаконьне і рэпрэсіі рэжыму, маштабу якіх Эўропа ня ведала з часоў Другой усясьветнай вайны.

А беларусы, гаворачы пра тых, хто ўчыняе гэтыя рэпрэсіі, успамінюць назву аповесьці Адамовіча — «Карнікі».

Думкі, выказаныя ў блогах, перадаюць погляды саміх аўтараў і не абавязкова адлюстроўваюць пазыцыю рэдакцыі.

  • 16x9 Image

    Сяргей Навумчык

    Сяргей Навумчык нарадзіўся ў 1961 годзе ў Паставах. Скончыў факультэт журналістыкі БДУ, служыў у войску, працаваў у віцебскай абласной газэце. Быў дэпутатам Вярхоўнага Савета Беларусі і каардынатарам парлямэнцкай апазыцыі БНФ. У 1996 годзе атрымаў палітычны прытулак у ЗША.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

Ігар Лосік Кацярына Андрэева Дар'я Чульцова Марына Золатава Ягор Марціновіч
XS
SM
MD
LG