Лінкі ўнівэрсальнага доступу

«Замежныя агенты, бандыты, якія чыняць тут абдзіралаўку». Лукашэнка заявіў, што заходнія санкцыі не застануцца без адказу


Плякат у руках пратэстоўца, архіўнае фота

Аляксандар Лукашэнка падчас сустрэчы з прэм’ер-міністрам Раманам Галоўчанкам загадаў распрацаваць шэраг контрасанкцый, якія тычацца эканомікі, гуманітарных праграмаў і мэдыя.

«Асабліва эўрапейцы шчыруюць у гэтым. Я ня буду тут надта разводзіць, выказваць нейкія думкі, проста скажу, каб вы разумелі: калі эўрапейцы хочуць праблем у сябе ў сувязі з гэтымі санкцыямі, яны іх атрымаюць. Больш нічога ня буду казаць, час пакажа», — цытуе яго БелТА.

Ён даў кіраўніку ўраду заданьне — падрыхтаваць інфармацыю пра найбольш буйныя эўрапейскія праекты і прадпрыемствы, створаныя на тэрыторыі Беларусі. Маўляў, трэба праверыць іх працу.

«Вас папрашу гэта зрабіць, як гэта было перад амэрыканскім „выпендрожам“ у эканоміцы... Наогул я заўсёды задаю пытаньне: каму гэта выгадна і навошта? Слухайце, мы абараняем сваю краіну, і мы з вамі, і ўвесь народ хоча жыць у сваёй краіне. Нас што, за гэта санкцыямі па галаве? Таму трэба адказваць», — сказаў ён, паралельна згадаўшы аб транзыце празь Беларусь.

«Выгадна, нявыгадна — яны ўжо, я бачу, пра гэта ня думаюць. Ну, ня думаюць — добра, будуць у Расею езьдзіць праз... Будуць хадзіць па Балтыцы, перавозіць грузы, і вакол Гішпаніі — у Міжземнае мора і праз Чорнае мора, калі ім дрэнна з нармальнай Беларусьсю ў цэнтры Эўропы. А так мы па-беларуску: галаву схаваем у пясок, як страўсы, і думаем — ну добра, вытрымаем. Не. Трэба паказваць, што мы нацыя і ў нас ёсьць свая зямля».

Таксама Лукашэнка паставіў задачу Савету міністраў разам зь Міністэрствам замежных спраў зрабіць рэвізію заходніх гуманітарных праграмаў і мэдыя.

«Гэтыя некамэрцыйныя арганізацыі, замежныя агенты, рознага роду бандыты, якія чыняць тут абдзіралаўку і іншае. Я даручаў кіраўніку адміністрацыі, перадайце, што на кантролі гэта трымаю. Мы дамаўляліся аб перарэгістрацыі і тых арганізацый, і сродкаў масавай інфармацыі. А то яны нас трымаюць на кароткім ланцужку і пачынаюць, калі гэта ім захочацца, тузаць», — абурыўся Лукашэнка.

Раней ён праанансаваў магчымасьць перадачы прэзыдэнцкіх паўнамоцтваў Савету бясьпекі, што плянуецца замацаваць асобным дэкрэтам.

Некаторыя нюансы праекту сёньня адкамэнтаваў Раман Галоўчанка, найперш спаслаўшыся на складаную зьнешнепалітычную сытуацыю.

«Якая будзе канчатковая вэрсія рэдакцыі дэкрэту, пакуль ня ведаю. Якое прэзыдэнт прыме рашэньне, так і будзе. Мы ўсе ведаем, што адбываецца вакол, якія мэты ставяць ворагі нашай дзяржавы — яны выходзяць за рамкі разуменьня маральных каштоўнасьцяў. Таму краіна павінна быць гатовая да ўсяго, да любога разьвіцьця сытуацыі. І прэзыдэнт як кіраўнік дзяржавы, галоўнакамандуючы, выдатна гэта разумее. Мы павінны быць гатовыя да любога разьвіцьця падзеяў, у тым ліку і на тых падставах, якія не закладзеныя ў дзейнай рэдакцыі Канстытуцыі: гэта магчымасьць фізычнай ліквідацыі кіраўніцтва краіны», — сказаў кіраўнік ураду.

Па словах Галоўчанкі, у праекце дэкрэту вызначана, як будзе функцыянаваць дзяржава ў выпадку пазаштатнай сытуацыі, каб не дапусьціць страты кіравальнасьці і мабілізаваць сілы на захаваньне спакою.

Што варта ведаць пра санкцыі ЗША

Першыя санкцыі, якія ўвяла адміністрацыя прэзыдэнта Джорджа Буша пасьля прэзыдэнцкіх выбараў у Беларусі ў 2006 годзе, прадугледжвалі блякаваньне ўласнасьці і актываў групы высокіх чыноўнікаў, уключна з Аляксандрам Лукашэнкам. Санкцыі распаўсюджваліся таксама і на сем’і гэтых чыноўнікаў. Ім таксама забаранілі ўезд на тэрыторыю ЗША.

Пазьней асобам, у тым ліку і новым, якія папоўнілі сьпісы, забаранілі мець актывы на тэрыторыі ЗША і весьці бізнэс з амэрыканскімі партнэрамі.

Пасьля прэзыдэнцкіх выбараў у Беларусі напрыканцы 2010 году ЗША пашырылі сьпіс беларускіх чыноўнікаў, якім забаронены ўезд у ЗША. Акрамя таго, грамадзянам ЗША забаранілі весьці бізнэс зь дзяржаўным канцэрнам «Белнафтахім» і шэрагам іншых прадпрыемстваў. Гэтак Злучаныя Штаты адрэагавалі на рэпрэсіі пасьля выбараў, у тым ліку на зьняволеньне шэрагу кандыдатаў у прэзыдэнты.

Пра якія беларускія прадпрыемствы ідзе гаворка

  • «Белнафтахім»,
  • «Белнафтахім ЗША»,
  • «Нафтан»,
  • «Беларускі нафтавы гандлёвы дом»,
  • «Белшына»,
  • «Гродна Азот»,
  • «Гроднахімвалакно»,
  • ААТ «Лякафарба»,
  • ААТ «Полацак-Шкловалакно».

Прадпрыемствам i грамадзянам ЗША было забаронена ўступаць у эканамічныя і фінансавыя дачыненьні з гэтымі арганізацыямі, а ўся іх маёмасьць і рахункі, якія знаходзяцца на тэрыторыі ЗША, былі замарожаныя. Да таго ж многія краіны і кампаніі адмаўляюцца працаваць з прадпрыемствамі, якія знаходзяцца пад санкцыямі ЗША.

  • У кастрычніку 2015 году Міністэрства фінансаў ЗША прыпыніла санкцыі супраць гэтых дзевяці беларускіх прадпрыемстваў у сувязі з «пэўным прагрэсам у сфэры дэмакратыі і правоў чалавека», а таксама з мэтай падтрымкі незалежнасьці і сувэрэнітэту Беларусі.
  • Пасьля прэзыдэнцкіх выбараў у Беларусі ў жніўні 2020 году і рэпрэсій, якія адбыліся пасьля іх, ЗША аднавілі санкцыі ад 3 чэрвеня 2021 году. Адпаведнае рашэньне 19 красавіка 2021 году апублікавала Міністэрства фінансаў ЗША.​ Злучаныя Штаты дабіваюцца вызваленьня ўсіх палітвязьняў.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

Ігар Лосік Кацярына Андрэева Дар'я Чульцова Марына Золатава Ягор Марціновіч
XS
SM
MD
LG