Лінкі ўнівэрсальнага доступу

Лукашэнка ўхваліў рэпрэсіўныя навацыі ў законы аб СМІ і масавых акцыях. Што зьменіцца?


СМІ ў Беларусі, архіўнае фота

Аляксандар Лукашэнка падпісаў навацыі ў заканадаўства аб сродках масавай інфармацыі. Пра гэта паведаміла ягоная прэсавая служба. Што зьменіцца ў працы рэдакцый і журналістаў?

Што зьменіцца ў законе «Аб СМІ»?

  • Пашыраецца пералік інфармацыі, распаўсюд якой у СМІ і на інтэрнэт-рэсурсах забаронены.
  • Уводзіцца забарона на разьмяшчэньне вынікаў апытаньняў грамадзкай думкі, якія адносяцца да грамадзка-палітычнай сытуацыі, праведзеных без неабходнай акрэдытацыі.
  • Таксама не дапускаецца разьмяшчэньня гіпэрспасылак на паведамленьні, распаўсюд якіх забаронены.
  • Генэральнаму пракурору, пракурорам абласьцей, гораду Менску даецца права абмяжоўваць доступ да інтэрнэт-рэсурсаў і сеткавых выданьняў, празь якія распаўсюджваюцца зьвесткі, накіраваныя «на прапаганду экстрэмісцкай дзейнасьці», а таксама іншая інфармацыя, пашырэньне якой здольнае «нанесьці шкоду нацыянальным інтарэсам».
  • Выпадкі абмежаваньня доступу да інтэрнэт-рэсурсаў і спыненьня выпуску СМІ дапаўняюцца такой падставай, як рашэньне Міжведамаснай камісіі ў бясьпецы інфармацыйнай сфэры аб наяўнасьці інфармацыйных паведамленьняў, распаўсюд якіх здольны нанесьці шкоду нацыянальным інтарэсам.
  • Разам з рашэньнем суду выпуск СМІ можа быць спынены рашэньнем Міністэрства інфармацыі — напрыклад, у выпадку вынясеньня юрыдычнай асобе, на якую ўскладзеныя функцыі рэдакцыі СМІ, або заснавальніку СМІ двух і больш пісьмовых папярэджаньняў.
  • Прадугледжваюцца меры, накіраваныя на мінімізацыю замежнага ўплыву на беларускі інфармацыйны рынак. Незалежна ад часу стварэньня СМІ, іх заснавальнікамі ня могуць выступаць замежныя юрыдычныя асобы, замежныя грамадзяне і асобы без грамадзянства, а таксама юрыдычныя асобы з замежным удзелам.
  • Уводзіцца магчымасьць пазбаўлення акрэдытацыі журналіста СМІ, калі ім або юрыдычнай асобай з функцыяй рэдакцыі парушаны парадак акрэдытацыі альбо распаўсюджаны звесткі, якія не адпавядаюць рэчаіснасьці, няславяць дзелавую рэпутацыю арганізацыі.
  • Замацоўваецца магчымасьць абмежаваньня доступу да копіі інтэрнэт-рэсурсу, доступ да якога быў абмежаваны.

Асноўныя палажэньні закону набываюць моц празь месяц пасля яго афіцыйнага апублікаваньня.

Што зьменіцца ў законе аб масавых мерапрыемствах?

Таксама Аляксандар Лукашэнка падпісаў закон, якім уносяцца зьмены ў заканадаўства аб масавых мерапрыемствах.

  • Выключаецца паведамляльны парадак арганізацыі масавых мерапрыемстваў.
  • Пасьля ўступленьня закону ў сілу ўсе масавыя мерапрыемствы павінны праводзіцца выключна на падставе дазволу мясцовых органаў.
  • Забараняецца збор, атрыманьне і выкарыстаньне грашовых сродкаў i iншай маёмасьцi, аказаньне паслуг для кампэнсацыі выдаткаў у выніку прыцягненьня да адказнасьці за парушэньне парадку правядзеньня масавых мерапрыемстваў.
  • Уводзіцца забарона асьвятленьня ў рэжыме рэальнага часу масавых мерапрыемстваў, якія праводзяцца з парушэньнем вызначанага парадку, у мэтах іх папулярызацыі або прапаганды. Гэтая забарона будзе распаўсюджвацца ў тым ліку на журналістаў.
  • Журналістам пры выкананні сваіх абавязкаў забараняецца выступаць у якасьці арганізатараў ці ўдзельнікаў масавых мерапрыемстваў.
  • Мясцовыя органы і органы ўнутраных спраў надзяляюцца правам прыпыняць працу інфраструктуры (гандлёвых аб’ектаў, аб’ектаў грамадзкага харчаваньня, транспарту, кірмашоў, арганізацый усіх формаў уласнасьці) у месцах правядзення масавых мерапрыемстваў і па маршрутах іх удзельнікаў.
  • Замацоўваецца адказнасьць палітычных партый і грамадзкіх аб’яднаньняў за публічныя заклікі сваіх кіраўнікоў і чальцоў да арганізацыі і правядзеньня масавага мерапрыемства да атрыманьня дазволу.

Асноўныя палажэньні закону набываюць моц празь месяц пасьля яго афіцыйнага апублікаваньня.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

Ігар Лосік Кацярына Андрэева Дар'я Чульцова Марына Золатава Ягор Марціновіч
XS
SM
MD
LG