Лінкі ўнівэрсальнага доступу

Алексін, Гуцэрыеў, Зайцаў, Цяцерын. Што за набліжаныя да Лукашэнкі бізнэсоўцы падпалі пад санкцыі


Сяргей Цяцерын (справа ад Аляксандра Лукашэнкі) трапіў пад санкцыі цяпер, а Аляксандар Шакуцін (справа ад Цяцерына) знаходзіцца ў «чорным сьпісе» Эўразьвязу са сьнежня 2020 году. Архіўнае фота

Эўразьвяз увёў забарону на ўезд і прыняў рашэньне замарозіць актывы 78 беларускіх афіцыйных асобаў і 8 прадпрыемстваў. Глядзім, што за набліжаныя да Аляксандра Лукашэнкі бізнэсоўцы трапілі ў сьпіс.

Міхаіл Гуцэрыеў

Міхаіл Гуцэрыеў (у цэнтры) і Аляксандар Лукашэнка
Міхаіл Гуцэрыеў (у цэнтры) і Аляксандар Лукашэнка

У санкцыйным дакумэнце: «Дзякуючы сяброўству з Лукашэнкам займеў значнае багацьце і ўплыў сярод палітычнай эліты ў Беларусі».

Расейскі алігарх, старшыня рады дырэктараў групы «Сафмар» і нафтагазавай кампаніі «РуссНефть», ягоны асабісты капітал ацэньваюць у 2 мільярды даляраў. Сяброўства Лукашэнкі і Гуцэрыева пачалося ў 2000-х гадах, калі алігарх стаў прэзыдэнтам кампаніі «Славнефть»; тады ён заняўся будаўніцтвам нафтабазаў і бэнзастанцыяў у Беларусі.

Падчас эпідэміі першай хвалі каранавірусу летась менавіта Гуцэрыеву паказальна тэлефанаваў Лукашэнка і прасіў дапамагчы з мэдыцынскай тэхнікай.

У Менску Гуцэрыеў пабудаваў гатэль «Рэнэсанс» і базу адпачынку ў Краснасельскім. Апроч таго, Гуцэрыеў — інвэстар рудніку ў Любані, які цяпер будуецца.

Аляксей Алексін

Аляксей Алексін. Архіўнае фота: TUT.BY
Аляксей Алексін. Архіўнае фота: TUT.BY

У санкцыйным дакумэнце: «Ён падтрымлівае цесныя адносіны з Аляксандрам Лукашэнкам і яго сынам і былым дарадцам па нацыянальнай бясьпецы Віктарам Лукашэнкам».

Адзін з найбуйнейшых бізнэсоўцаў у Беларусі, які атрымаў ад дзяржавы выключныя правы ў сфэры гандлю тытунём. Гэта ягоныя «Табакеркі» зьяўляюцца цяпер па ўсёй Беларусі.

Саўладальнік кампаніі «Брэміна Груп» — буйнога лягістычнага апэратара.

Аляксандар Зайцаў

Аляксандар Зайцаў. Архіўнае фота Вадзіма Заміроўскага, TUT.BY
Аляксандар Зайцаў. Архіўнае фота Вадзіма Заміроўскага, TUT.BY

У санкцыйным дакумэнце: «Праз доступ да сям'і Лукашэнкі Зайцаў атрымлівае выгадныя кантракты для свайго бізнэсу».

Буйны бізнэсовец, ягоныя інтарэсы — гандаль з Аб’яднанымі Арабскімі Эміратамі і краінамі Афрыкі. Ягоная кампанія Sohra Overseas пазыцыянуе сябе як асноўны пастаўшчык цывільнай прадукцыі беларускіх дзяржпрадпрыемстваў у краіны Пэрсыдзкай затокі і Афрыку.

Лілія Лукашэнка

Лілія Лукашэнка зь сям'ёй. Архіўнае фота
Лілія Лукашэнка зь сям'ёй. Архіўнае фота

Жонка старэйшага сына Лукашэнкі Віктара, зьвязаная з шэрагам кампаній, якія маюць бонусы ад Аляксандра Лукашэнкі, а менавіта Dana Holding/Dana Astra.

Лілія Лукашэнка доўгі час працавала намесьніцай дырэктара гэтай кампаніі, якою валодаюць дзьве кіпрскія фірмы. Галоўнымі ж уладальнікамі «Дана Астра» лічацца сэрбскія прадпрымальнікі браты Карычы.

Сяргей Цяцерын

Сяргей Цяцерын у рэстаране «Лебядзіны» 13 студзеня 2020
Сяргей Цяцерын у рэстаране «Лебядзіны» 13 студзеня 2020

У санкцыйным дакумэнце: «Набліжаны да атачэньня Лукашэнкі».

Кіраўнік кампаніі «Белглобалстарт», асноўны напрамак кампаніі — продаж алькаголю. Сяргея Цяцерына называюць блізкім сябрам Аляксандра Лукашэнкі, іх неаднойчы заўважалі разам на спартовых турнірах. Цяпер Сяргей Цяцерын таксама ўзначальвае Беларускую фэдэрацыю тэнісу.

Раней, у кастрычніку, лістападзе і сьнежні, Эўразьвяз увёў тры пакеты санкцый супраць уладаў Беларусі. Абмежавальныя захады тычацца афіцыйных асобаў, а таксама некаторых прадпрыемстваў. Агулам у санкцыйным сьпісе тады апынуліся 84 асобы, якім забаронены ўезд у краіны ЭЗ. У сьпіс уваходзяць Аляксандар Лукашэнка, ягоны сын Віктар Лукашэнка, кіраўніца ЦВК Лідзія Ярмошына, старшыня КДБ Іван Тэртэль, старшыня Сьледчага камітэту Іван Наскевіч, генпракурор Андрэй Швед і іншыя сілавікі, а таксама судзьдзі і чальцы выбарчых камісіяў.

Сярод іншага, ЭЗ увёў санкцыі супраць юрыдычных асобаў: ЗАТ «Белтэхэкспарт», «Дана Холдынгз/Дана Астра», Кіраўніцтва спраў прэзыдэнта Беларусі, ТАА «Сінэзіс», ААТ «АГАТ — электрамэханічны завод», ААТ «140-ы рамонтны завод» і ААТ «Менскі завод колавых цягачоў».

* У папярэдняй вэрсіі публікацыі памылкова сьцьвярджалася, што Міхаіл Гуцэрыеў мае дачыненьне да кампаніі VP Capital. Гэтая інфармацыя выдаленая.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

Ігар Лосік Кацярына Андрэева Дар'я Чульцова Марына Золатава Ягор Марціновіч
XS
SM
MD
LG