Лінкі ўнівэрсальнага доступу

На саміце ЭЗ разгарэлася спрэчка пра вугорскі закон аб «прапагандзе ЛГБТ»


Віктар Орбан на саміце ЭЗ, Брусэль, 24 чэрвеня 2021

Лідэры шэрагу краінаў Эўразьвязу ўступілі ў чацьвер на саміце ЭЗ у Брусэлі ў жорсткую дыскусію з прэм’ер-міністрам Вугоршчыны Віктарам Орбанам, асуджаючы яго за прыняты нядаўна ў Вугоршчыне закон, які абмяжоўвае правы ЛГБТ.

Закон, у прыватнасьці, забараняе выкарыстоўваць у навучальных праграмах для непаўналетніх матэрыялы, якія могуць разглядацца як «прапаганда ЛГБТ». Крытыкі дакумэнту параўноўваюць яго зь дзейным у Расеі законам аб забароне так званай «прапаганды гомасэксуалізму».

Сярод тых, хто ўступіў з Орбанам у спрэчкі, былі прэмʼер-міністар Нідэрляндаў Марк Рутэ і прэзыдэнт Францыі Эманюэль Макрон. Пра гэта расказалі яны самі. Агенцтва Reuters апісвае дыскусію як самую вострую на самітах ЭЗ за апошнія некалькі гадоў.

Абодва палітыкі — Рутэ і Макрон — заявілі, што выступілі ў абарону «эўрапейскіх каштоўнасьцяў», і сказалі Орбану, што калі ён гэтыя каштоўнасьці не прызнае, то Вугоршчыне пад яго кіраўніцтвам варта было б пакінуць ЭЗ. Прэзыдэнт Францыі сказаў, што выступае за тое, каб Вугоршчына засталася ў складзе Эўразьвязу, але пры гэтым заклікаў да «культурнай і цывілізацыйнай барацьбы» супраць палітыкі ўладаў гэтай краіны.

Лідэры 17 з 27 краінаў ЭЗ падпісалі дакумэнт з заклікам да Будапэшту адмяніць закон і выконваць правы чалавека, у тым ліку прадстаўнікоў ЛГБТ. Не падтрымалі гэты ліст галоўным чынам суседзі Вугоршчыны, у прыватнасьці, Польшча і Славенія.

Кіраўніцтва ЭЗ таксама можа зьвярнуцца ў Эўрапейскую судовую палату з хадайніцтвам аб ацэнцы вугорскага закону. Тэарэтычна гэтая спрэчка можа прывесьці да таго, што Вугоршчына страціць фінансаваньне з эўрапейскіх фондаў.

  • Спрэчка вакол вугорскага закону была не адзіная на саміце ЭЗ. Лідэры ня здолелі прыйсьці да згоды таксама ў пытаньні аб мэтазгоднасьці правядзеньня саміту з прэзыдэнтам Расеі Ўладзімірам Пуціным. Рознагалосьсі прызнаў пасьля саміту Макрон. Ён зьдзівіўся, што лідэры краінаў Балтыі і шэрагу іншых дзяржаваў, якія выступілі супраць перамоваў з Расеяй на вышэйшым узроўні, не пярэчылі супраць таго, каб з Пуціным сустракаўся прэзыдэнт ЗША Джо Байдэн. Па словах Макрона, сам ён з Пуціным сустракаўся і будзе сустракацца, але важны адзіны падыход ЭЗ да адносінаў з Расеяй.
  • Пасьля доўгай дыскусіі, у якой галасы за і супраць саміту падзяліліся прыкладна пароўну, лідэры ЭЗ адмовіліся ад ідэі правесьці сустрэчу з Пуціным у бліжэйшы час. У Крамлі выказалі расчараваньне ў сувязі з гэтым.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

Ігар Лосік Кацярына Андрэева Дар'я Чульцова Марына Золатава Ягор Марціновіч
XS
SM
MD
LG