Лінкі ўнівэрсальнага доступу

Блогер Уладзімер Цыгановіч з турмы: «Пераабувацца пасьля ўсяго, што было за гэты год, ня мае сэнсу»


Уладзімер Цыгановіч, архіўнае фота

У гомельскім СІЗА працягваюць судзіць фігурантаў «справы Ціханоўскага». Сярод іх — вядомы блогер Уладзімер Цыгановіч (youtube-канал «МозгOn»).

41-гадовага аўтара Youtube-канала «MozgON» Уладзімера Цыгановіча абвінавачваюць паводле двух артыкулаў Крымінальнага кодэксу: ч. 1 арт. 293 КК (арганізацыя масавых беспарадкаў), ч. 3 арт. 130 КК (распальваньне сацыяльнай варожасьці).

Жонка блогера Натальля падзялілася са Свабодай апошнімі лістамі ад Уладзімера.

У дзень пачатку суду, 24 чэрвеня, Уладзімер зазначыў, што ў закрытым судзе ён бачыць «свае бонусы». «Напрыклад, няма неабходнасьці ў такую сьпёку некуды ехаць. Усё на месцы. Сёньня ў мяне ўсё хутка скончылася. Дарэчы, вуліца Кніжная на мапе 1910 году называлася вуліцай Турэмнай», — напісаў палітзьняволены.

Ён піша, што нягледзячы на сьпёку, займаецца ў камэры фізычнымі практыкаваньнямі. «Думаю, што адвакаты будуць мной ня вельмі задаволеныя, але ты павінна разумець, што ў мяне выбар просты — як у мультфільме „Полкан и Шавка“ (савецкі мультфільм 1949 году, дзе апавядаецца пра здраду і баязьлівасьць сабакі Шаўкі. — РС). Мой выбар ты ведаеш. Пераабувацца пасьля ўсяго, што было за гэты год, ня мае сэнсу», — кажа блогер.

Паралельна з судовым працэсам Цыгановіч знаёміцца з матэрыяламі справы.

«Бліжэйшыя два тыдні ў мяне пост, „дыета“. Ня буду есьці мяса, сала, малочных прадуктаў, і, спадзяюся, сыдуць лішнія два кіляграмы. Другі бонус, што ня так будзе хацецца спаць на судах», — піша жонцы Ўладзімер.

У сувязі са сьпёкай у турме яму прыйшлі ідэі наконт адзеньня, калекцыю якога ён хоча назваць «Сьлімак-рулетка»: каб рукавы кашулі ці нагавіцаў самі закасваліся. Таксама ён прыдумляе адзеньне на сьпёку, дзе тканіна будзе толькі ззаду, а сьпераду — шлейкі, якія фіксуюць форму.

Іншая ідэя Цыгановіча — пра шакаляд: ён прыдумаў цукеркі ў форме белых і чорных шахматных фігур, а ўпакоўку для іх — у форме шахматнай дошкі. «Можна рэальна згуляць у такія шахматы, праўда, адзін раз», — дадае блогер.

Уладзімера Цыгановіча затрымалі 9 чэрвеня 2020 году.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

Ігар Лосік Кацярына Андрэева Дар'я Чульцова Марына Золатава Ягор Марціновіч
XS
SM
MD
LG