Лінкі ўнівэрсальнага доступу

«Залатую пальмавую галіну» Канскага кінафэстывалю атрымаў фільм «Тытан»


Жулія Дзюкурно, рэжысэрка пераможнага фільму

Уладальнікам Залатой пальмавай галіны, галоўнай узнагароды 74-га Канскага кінафэстывалю, стаў фільм жанру body horror «Тытан» францускай рэжысэркі Жуліі Дзюкурно.

Цырымонія абвяшчэньня пераможцаў прайшла ў суботу ў Палацы фэстываляў.

Другую паводле значнасьці ўзнагароду Канскага кінафэстывалю, Гран-пры, заваявалі адразу дзьве работы: іранскі фільм «Герой» рэжысэра Асгара Фархадзі і фільм «Купэ нумар шэсьць» фінскага рэжысёра Юха Куосманэна.

Уладальнікам узнагароды за найлепшую рэжысуру стаў францускі рэжысэр Леос Каракс за фільм «Анэт».

Найлепшым акторам стаў Калеб Лэндры Джонс за ролю ў фільме «Нітрам» аўстралійскага рэжысэра Джастына Курзэля. Узнагарода за найлепшую жаночую ролю дасталася Рэнаце Рэйнсвэ за працу ў фільме нарвэскага рэжысэра Ёакима Трыера «Найгоршы чалавек на сьвеце».

Прыз за найлепшы сцэнар дастаўся японскаму фільму «Сядзь за стырно маёй машыны» рэжысэра Р’юсукэ Хамагуці, які экранізаваў апавяданьне Харукі Муракамі.

Прыз журы дастаўся дзьвюм карцінам — «Калена Ахеда» ізраільскага рэжысэра Надава Лапіда і «Памяць» тайскага рэжысэра Апічатпонга Вірасэтакула.

Ганаровую Залатую пальмавую галіну ўручылі італьянскаму актору і рэжысэру Марка Бэлёкьё.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

Ігар Лосік Кацярына Андрэева Дар'я Чульцова Марына Золатава Ягор Марціновіч
XS
SM
MD
LG