Лінкі ўнівэрсальнага доступу

Як дзяржпрапаганда даказала, што Польшча ня мае нічога супольнага зь беларускімі пратэстамі і тэлеграм-каналамі


Блогер Сьцяпан Пуціла і бацькі блогера Рамана Пратасевіча з кіраўніком Беларускага дому ў Варшаве Алесем Зарэмбюком

Адзін расейскамоўны тэлеграм-канал апублікаваў учора артыкул пад назвай «Работа правительства Польши с белорусскими оппозиционными блогерами».

Сёньня пра тое ж радасна крычыць «Саўбелка» вуснамі Гладкай: «Подтверждение того, что польские правители лично курировали работу экстремистских телеграм-каналов» і «августовское обсуждение плана действий Польши против Беларуси».

Але як звычайна бывае з прапагандай — усё акурат наадварот.

Магчыма, вы чулі пра скандал у Польшчы. Хакеры ўзламалі эмэйл кіраўніка канцэлярыі ўраду Міхала Дворчыка. Зь неасцярожнасьці той карыстаўся прыватнай скрыняй у службовых мэтах. Частка ягонай перапіскі датычыць Беларусі. Але тэзіс, які жадала даказаць прапаганда, што маўляў, гэтая перапіска даказвае ўдзел Польшчы ў пратэстах і каардынацыі блогераў, цалкам зьняпраўджаны ёй жа.

Што мы бачым у гэтай перапісцы? Мы бачым, што правая рука польскага прэм’ера просіць былога першага сакратара пасольства Польшчы ў Беларусі Марэка Буцьку (якога ў публікацыі называюць рэзыдэнтам польскай разьведкі) скласьці яму сьпіс беларускіх блогераў, па пару абзацаў інфармацыі і здымак. Стоп! Калі Польшча трымае на кручку беларускіх блогераў і тэлеграм-каналы, якія нібыта каардынуюць пратэсты, то навошта прадстаўніку ўраду (!!!) прасіць былога дыпламата, які цяпер працуе ў грамадзкай арганіацыі, скласьці яму такі сьпіс? Ён мусіць проста даць заданьне спэцслужбам перадаць яму дакумэнты аб сваіх агентах, не? Маўляў, скінь папкі нашых хлопцаў. Далей яшчэ больш сьмешна.

«Выведнік» Буцька адказвае на просьбу Дворчыка: «Я нікога зь іх ня ведаю, гэта маладое пакаленьне». Насамрэч усё вельмі банальна. Дворчык, правая рука польскага прэм’ера, ведае, што польская выведка і блізка не стаяла да беларускіх блогераў, таму просіць памагчы з інфармацыяй даўняга знаёмага Буцьку, які калісьці працаваў у Беларусі.

Ёсьць і яшчэ адзін нюанс. Перапіска Дворчыка і Буцькі адбываецца... пасьля 18 жніўня. Ужо тыдзень пасьля чатырых дзён жорсткіх сутыкненьняў у Менску і іншых гарадах. Пасьля 300-тысячнай дэманстрацыі і стварэньня Каардынацыйнай рады (дарэчы, правая рука прэм’ера Польшчы просіць расказаць, хто гэтыя людзі ў той Каардынацыйнай радзе). То бок гэта даказвае, што Польшча ня толькі не магла каардынаваць ніякіх пратэстаў, блогераў. Яна банальна ня ведала, хто ўсе гэтыя людзі. Канцылярыя польскага прэм’ера зацікавіліся і блогерамі, і рэштай ужо пасьля фазы першых пратэстаў. А зацікавілася чаму? Бо проста хацела памагчы ў рамках праграмы «Салідарныя зь Беларусьсю» і ня ведала, каму памагаць.

А вішанька на торце — NEXTA. У той час, як дзяржаўная прапаганда ў Беларусі вешала локшыну на вушы, што за ім стаіць Польшча, правая рука польскага прэм’ера распытвае ў былога дыплямата, а што гэта за чалавек. І Буцька (той, што нібыта выведнік) выказвае надзею, што ў польскай пракуратуры ня знойдзецца дурня, які выдасьць яго Беларусі (!!!). То бок у той час, калі БелТА піша, што Пуціла працуе ў штабе польскай спэцгрупы псыхалягічных апэрацый «Чорныя павукі» (для палякаў такое словазлучэньне навіна) пад горадам Быдгашч, «польскі выведнік» піша ва ўрад, што ня ведае, хто гэта, высылае нагугленую інфу (як і ўся іншая ў ягоных мэйлах) і спадзяецца, што яго не выдадуць у Беларусь.

Думкі, выказаныя ў блогах, перадаюць погляды саміх аўтараў і не абавязкова адлюстроўваюць пазыцыю рэдакцыі.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

Ігар Лосік Кацярына Андрэева Дар'я Чульцова Марына Золатава Ягор Марціновіч
XS
SM
MD
LG