Лінкі ўнівэрсальнага доступу

Пабудова Літвой загароды на мяжы зь Беларусьсю спынілася. Скончыўся калючы дрот


Пабудова загароды на мяжы зь Беларусьсю затармазілася з прычыны нястачы калючага дроту.

Пра гэта паведамляе балтыйскае агенцтва BNS са спасылкай на намесьніка міністра ўнутраных спраў Літвы Арнальдаса Абрамавічуса.

Два тыдні таму ў Літве пачалі будаваць фізычную перашкоду з калючага дроту. Будаўніцтвам занялася армія, пастаўкі даручылі арганізаваць МУС і Службе аховы дзяржаўнай мяжы.

23 ліпеня міністар нацыянальнай абароны Літвы Арвідас Анушаўскас паведаміў у Фэйсбуку, што з вайсковых рэзэрваў было выкарыстана 4,5 км калючага дроту, і цяпер, каб працягнуць абсталяваньне загароды, патрабуюцца пастаўкі з-за мяжы.

Паводле намесьніка міністра МУС Літвы, некалькі краін, у тым ліку Данія і Славаччына, заяўляюць пра гатовасьць прадаць калючы дрот ці перадаць яго бязвыплатна.

Раней міністарка ўнутраных спраў Літвы Агне Білатайце заявіла, што збудаваць фізычны бар’ер плянуецца на 550-кілямэтровым участку мяжы. Кіраўнік Службы аховы дзяржаўнай мяжы Рустам Любаеў адзначыў, што загароду можна паставіць цалкам за некалькі месяцаў.

Літва пачала будаваць на мяжы загароду з калючага дроту 9 ліпеня. Прынята таксама рашэньне паралельна ўзводзіць дадатковы плот.

За мінулы дзень у Літве затрымалі 92 мігрантаў, якія незаконна перасеклі мяжу з боку Беларусі. З пачатку 2021 году літоўскія памежнікі затрымалі на мяжы зь Беларусьсю 2430 мігрантаў — у 30 разоў больш, чым за ўвесь 2020-ты. Сярод затрыманых — грамадзяне Іраку (1380), Конга (184), Камэруну (124), Гвінэі (78), Аўганістану (77), Ірану (74), Расеі (76), Сырыі (71) і іншых краін, а таксама асобы, у якіх не было дакумэнтаў.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

Ігар Лосік Кацярына Андрэева Дар'я Чульцова Марына Золатава Ягор Марціновіч
XS
SM
MD
LG