Лінкі ўнівэрсальнага доступу

Журналісту Андрэю Аляксандраву прадоўжылі тэрмін утрыманьня пад вартай да 12 лістапада


Палітвязьні Андрэй Аляксандраў і Ірына Злобіна.

Мэдыямэнэджару і журналісту Андрэю Аляксандраву працягнулі тэрмін утрыманьня пад вартай яшчэ на два месяцы, да 12 лістапада.

Пра гэта ён паведаміў у лісьце сваім сябрам, піша сайт naviny.online.

Андрэя Аляксандрава і ягоную сяброўку Ірыну Злобіну затрымалі 12 студзеня, за кратамі яны ўжо 8 месяцаў. 14 студзеня ў рамках расьсьледаваньня справы Аляксандрава прайшоў ператрус у офісе інфармацыйнай кампаніі БелаПАН, дзе ў 2014–2018 гадах ён працаваў намесьнікам дырэктара.

  • Спачатку Аляксандрава абвінавацілі па частках 1 і 2 артыкула 342 КК РБ («Арганізацыя і падрыхтоўка дзеяньняў, што груба парушаюць грамадзкі парадак, альбо актыўны ўдзел у іх»). Максымальны тэрмін утрыманьня пад вартай па гэтым артыкуле — 6 месяцаў, ён скончыўся сёньня, 12 ліпеня.
  • 30 чэрвеня Аляксандраву прад’явілі новае абвінавачаньне — па ч. 1 арт. 356 Крымінальнага кодэксу (здрада дзяржаве). Яму пагражае ад 7 да 15 гадоў пазбаўленьня волі.
  • 31 жніўня Аляксандрава прызналі падазраваным па ч.2 арт.243 КК (ухіленьне ад сплаты падаткаў).

Даваць паказаньні ён адмовіўся.

Аляксандрава і яго дзяўчыну Ірыну Злобіну затрымалі ў Менску 12 студзеня 2021 году і абвінавацілі ў фінансаваньні пратэстаў (ч. 1 і 2 арт. 342 КК). На пачатку ліпеня Аляксандраву выставілі новае абвінавачаньне — па ч. 1 арт. 356 КК (здрада дзяржаве). Беларускія праваабаронцы прызналі яго палітвязьнем.

Паводле намесьніка міністра ўнутраных спраў Генадзя Казакевіча, Аляксандраў і яго сяброўка Ірына Злобіна «затрыманыя па падазрэньні ў фінансаваньні акцый пратэсту». Яны супрацоўнічалі з краўдфандынгавай плятформай BY_help, якая дапамагала ўдзельнікам пратэстаў выплачваць штрафы. З 22 жніўня да 9 лістапада 2020 году Аляксандраў і Злобіна аплацілі больш за 250 штрафаў.

12 красавіка стала вядома, што ўпраўленьне СК па Менску завяло крымінальныя справы ў дачыненьні да заснавальнікаў ініцыятывы BY_help Аляксея Лявончыка і Андрэя Стрыжака, якія, паводле вэрсіі сьледзтва, перадавалі грошы Аляксандраву і Злобінай «для наступнага іх выкарыстаньня ў злачыннай дзейнасьці».

Праваабаронцы сьцьвярджаюць, што аплата штрафаў не зьяўляецца фінансаваньнем групавых дзеяньняў, якія груба парушаюць грамадзкі парадак, і прызналі Андрэя Аляксандрава і Ірыну Злобіну палітвязьнямі.

У менскім СІЗА № 1 Аляксандраў і Злобіна пастаўленыя на ўлік як «асобы, схільныя да экстрэмізму».

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

Ігар Лосік Кацярына Андрэева Дар'я Чульцова Марына Золатава Ягор Марціновіч
XS
SM
MD
LG