Лінкі ўнівэрсальнага доступу

Навіны палітвязьняў 23 верасьня: Севярынец патэлефанаваў жонцы, Сапезе падоўжылі арышт

абноўлена

Павал Севярынец

Па стане на 23 верасьня 671 чалавек у Беларусі прызнаны палітычным вязьнем.

Відэазванок Севярынца

Павал Севярынец з турмы ўпершыню патэлефанаваў сваёй жонцы. Пра гэта Вольга Севярынец напісала ў фэйсбуку. Яна паведаміла, што гэта быў відэазванок праз Viber.

Цяпер Павал знаходзіцца ў калёніі ў Шклове.

Суд над Любецкім

Стала прыкладна вядома, калі пачнецца суд над хірургам Андрэем Любецкім. Яго вінавацяць у «абразе Лукашэнкі». Суд павінен пачацца ў кастрычніку-лістападзе, паведамляюць Naviny.by.

Пра гэта сам сталічны лекар напісаў у лісьце з жодзінскай турмы, у якой яго ўтрымліваюць з 4 траўня. За кратамі Любецкі стаў праяўляць больш цікавасьці да беларускай мовы, вучыць нямецкую, спрабуе займацца спортам, піша вершы. Піша, што не баіцца магчымага прысуду.

Андрэй Любецкі 18 гадоў адпрацаваў у дзіцячай лякарні № 4 Менску сківічным хірургам. Валянтэрыў каля ІЧУ на Акрэсьціна. Мае чацьвёра дзяцей. Жонка Натальля разам зь імі вымушана пакінула краіну. Яна фігуравала ў фільме «Манкурты» на дзяржаўнай тэлевізіі. Яе абвінавачвалі ў сувязі з «экстрэмістамі».

Падаўжэньне арышту Сапегі

Расейская грамадзянка Соф’я Сапега, затрыманая беларускімі спэцслужбамі 23 траўня на самалёце разам з блогерам Раманам Пратасевічам, будзе знаходзіцца пад арыштам да 25 сьнежня. Пра тое, што Соф’і падоўжылі ўтрыманьне пад вартай, расейскай службе ВВС расказала маці палітзьняволенай Ганна Дудзіч.

Маці палітзьняволенай у размове з Deutsche Welle адзначыла, што яе дачка пераносіць усе цяжкасьці даволі годна, а сваякі знаходзяцца ў рэжыме чаканьня. Тэлефонныя размовы адбываюцца штодня. Пытаньне памілаваньня Сапега абмяркоўвала з адвакатам Філановічам, але канкрэтыка ў пытаньні невядомая. Таксама маці ня ўпэўненая, што ў выпадку перадачы дачкі ў Расею яе там адразу вызваляць з-пад варты.

Абаронца Сапегі пракамэнтаваў інфармацыю пра працягненьне хатняга арышту.

«У адпаведнасьці з крымінальна-працэсуальным заканадаўствам Рэспублікі Беларусь абавязак азнаямленьня абаронцы з працягненьнем дадзенага тэрміну ў сьледзтва адсутнічае. З боку абаронцаў паведамляем, што сьледчыя дзеяньні з удзелам Соф’і працягваюцца, яна знаходзіцца пад хатнім арыштам, адчувае сябе нармальна».

Суд над музыкам аб замене меры пакараньня перанесьлі

Проста ў будынку папраўчай установы («хіміі») у Віцебску пачаўся працэс аб замене пакараньня палітвязьню Ігару Банцэру. Зьняволены за танец у майтках у 2020 годзе музыка можа адправіцца замест «хіміі» ў калёнію, бо кіраўніцтва віцебскай установы паскардзілася на 6 парушэньняў рэжыму зь ягонага боку, піша «Вясна».

На пачатку паседжаньня Банцэр запатрабаваў адваката, таму разгляд адклалі. Новае паседжаньне адбудзецца 29 верасьня.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

Ігар Лосік Кацярына Андрэева Дар'я Чульцова Марына Золатава Ягор Марціновіч
XS
SM
MD
LG