Лінкі ўнівэрсальнага доступу

Ужо больш за 4300 мігрантаў трапілі ў Нямеччыну «беларускім маршрутам»

абноўлена

Ілюстрацыйнае фота

Цяпер у Нямеччыне самая вялікая колькасьць мігрантаў зь Беларусі. Да гэтага найбольш іх было ў Літве — амаль 4,2 тысячы. 

Паводле фэдэральнай паліцыі Нямеччыны, з жніўня звыш 4300 чалавек незаконна трапілі ў Нямеччыну, перайшоўшы мяжу Беларусі з Польшчай, паведаміў Spiegel з спасылкай на dpa.

Прычым за першыя сем месяцаў «беларускім маршрутам» ў Нямеччыну прыйшлі толькі 26 мігрантаў. Але ў жніўні іх колькасьць вырасла да 474, у верасьні — да 1914, а толькі за 11 дзён кастрычніка — да 1934.

Рэгіянальныя аддзяленьні нямецкай паліцыі паведамляюць пра дзясяткі затрыманых на нямецка-польскай мяжы мігрантаў кожны дзень.

Бальшыня мігрантаў паходзіць з Іраку, Сырыі, Емэну і Ірану. Міграцыйныя цэнтры запоўненыя. Новых людзей разьмяшчаюць у намётах, якія ацяпляюцца.

Яшчэ 2 дні таму, 11 кастрычніка, паліцыя Нямеччыны паведамляла пра больш як 2,6 тысячы затрыманых мігрантаў з пачатку году, аднак адзначала рэзкае павелічэньне іх колькасьці.

У Польшчы за мінулы дзень спынілі 470 спробаў парушэньня мяжы. У гэтым месяцы такіх спробаў было ўжо 6,7 тысячы, а з пачатку году — 18,3 тысячы, паведаміла польская служба аховы мяжы. Таксама затрымалі 4 чалавек, якія дапамагалі мігрантам ў нелегальным пераходзе мяжы. Усяго сёлета затрымалі 250 такіх памагатых.

Прэс-сакратар каардынатара спэцслужбаў Польшчы Станіслаў Жарын рэгулярна публікуе ў твітэры папярэджаньне да мігрантаў на розных мовах пра марнасьць спробаў трапіць у ЭЗ празь беларуска-польскую мяжу.

«Дарога зь Беларусі ў Нямеччыну вядзе праз Польшчу. Польская мяжа ахоўваецца. Практычна ўсе нелегальныя мігранты не перасякаюць мяжу. Палякі затрымліваюць мігрантаў штодня. Многія зь іх чакаюць вяртаньня ў сваю краіну. Дарога празь Беларусь — вельмі дарагое падарожжа», — піша прадстаўнік польскіх спэцслужбаў.

Служба аховы дзяржаўнай мяжы Літвы не прапусьціла ў краіну зь Беларусі 93 мігрантаў за мінулыя суткі, паведамляе Delfi.lt. Памежнікі Беларусі маюць інфармацыю пра працу сваіх літоўскіх калегаў і дзякуючы гэтаму ўскладняюць іх дзейнасьць, заявілі ў Службе аховы дзяржаўнай мяжы Літвы.

Колькасьць мігрантаў у пэўныя пэрыяды часу павялічваецца то ў адным, то ў іншым месцы на літоўска-беларускай мяжы працягласьцю 678 км, і гэта не выпадковасьць, мяркуе літоўскі бок. У сувязі з гэтым служба не ўдакладняе месца, дзе не былі прапушчаныя мігранты.

У Латвіі ўчора спынілі 23 спробы парушэньня мяжы з боку Беларусі.

Міграцыйны крызіс — 2021. Асноўнае

  • У ліпені 2021 году Аляксандар Лукашэнка заявіў, што з прычыны санкцыяў Беларусь больш ня будзе стрымліваць нелегальную міграцыю ў краіны Эўразьвязу. Найперш вялікія патокі мігрантаў накіраваліся ў Літву, па стане на верасень — звыш 4,2 тысячы чалавек з краінаў Азіі і Афрыкі. Затым напружаньне на сваіх межах адчулі Латвія і Польшча.
  • Рэагуючы на крызіс, Літва і Польшча пачалі будаваць сьцяну на мяжы зь Беларусьсю.
  • Урады Літвы, а затым Латвіі і Польшчы, улетку 2021-га зрабілі істотна больш строгім заканадаўства аб нелегальным перасячэньні дзяржаўнай мяжы, а таксама выслалі ў памежныя зь Беларусьсю раёны падмацаваньне з вайсковых злучэньняў. Лукашэнку абвінавацілі ў спрыяньні нелегальнай міграцыі ў краіны Эўразьвязу.
  • У Літве ў лягерах для ўцекачоў мігранты неаднаразова ладзілі бунты і намагаліся зьбегчы.
  • Улады Польшчы зь верасьня распачалі затрыманьні і дэпартацыі людзей, якія дапамагаюць мігрантам нелегальна перасякаць мяжу. Сярод іх як грамадзяне Польшчы, так і грамадзяне Беларусі, краінаў Азіі, у тым ліку некаторыя асобы, што маюць від на жыхарства ў краінах Эўразьвязу.
  • Прэм’ер-міністар Польшчы Матэвуш Маравецкі выказаў упэўненасьць, што сцэнар «гібрыднай агрэсіі» супраць Эўразьвязу быў распрацаваны Менскам не самастойна, а ў шчыльнай супрацы з Масквой.
  • Прэс-сакратар каардынатара спэцслужбаў Польшчы Станіслаў Жарын 27 верасьня заявіў, што 20% затрыманых мігрантаў маюць сувязі з Расеяй, пра што сьведчаць знойдзеныя доказы. Міністар унутраных спраў і адміністрацыі Мар’юш Каміньскі сказаў, што беларускія памежнікі даюць мігрантам псыхатропныя сродкі, у тым ліку дзецям.
  • 30 верасьня ПАРЭ катэгарычна асудзіла практыку вяртаньня мігрантаў «у трэцюю краіну, дзе ім ня можа быць гарантавана міжнародная абарона», і нагадала Латвіі, Літве і Польшчы пра забарону на калектыўную высылку іншаземцаў.
  • 8 кастрычніка Варшава заявіла, што трактуе паводзіны беларускага боку як «агрэсіўныя дзеяньні супраць Польшчы». Зьявіўся шэраг відэадоказаў, што беларускія памежнікі ня толькі не спыняюць мігрантаў, але і актыўна дапамагаюць ім нелегальна перасякаць польскую мяжу.
  • На межах Беларусі з Польшчай і Літвой ад пачатку міграцыйнага крызісу загінулі сама меней 9 чалавек.
  • 8 лістапада раніцай на мяжы зь беларускага боку заўважылі буйную калёну зь некалькіх сотняў мігрантаў, якія рушылі ў суправаджэньні ўзброеных сілавікоў да калючага дроту на мяжы з Польшчай, намагаючыся перасекчы мяжу. Паводле розных ацэнак, іх колькасьць была ад 2 да 4 тысяч чалавек. Многія атрымалі візы ў беларускім дыпляматычным прадстаўніцтве ў Анкары, турэцкія авіякампаніі ўдзельнічаюць у перакіданьні мігрантаў у Беларусь.
  • У наступныя дні мігранты пры спрыяньні беларускіх сілавікоў сталі лягерам на памежнай паласе. Курд з Іраку Рэбаз Наджм Хама Саід сказаў Свабодзе, што беларуская міліцыя дапамагае высякаць дрэвы для вогнішчаў на беларускай жа тэрыторыі. Некаторым групам удалося прарвацца на польскую тэрыторыю, але вайскоўцы затрымалі ўсіх парушальнікаў.
  • 10 лістапада эўрадэпутат Радаслаў Сікорскі заявіў, што крызіс на мяжы ініцыяваны пры падтрымцы Масквы, а Лукашэнку трэба прызнаць тэрарыстам і выдаць Міжнароднаму трыбуналу. Шэраг іншых эўрапейскіх палітыкаў таксама выказалі ўпэўненасьць, што Пуцін з дапамогай Лукашэнкі расхіствае Эўропу, пачуліся заклікі да ЭЗ дзейнічаць актыўна, а не чакаць.
  • 11 лістапада ў паветранай прасторы Беларусі пачалі патруляваць межы расейскія бамбавікі Ту-22М3. Яны належаць паветрана-касьмічным сілам Расеі.
  • 11 лістапада Фэдэральная паліцыя Нямеччыны заявіла, што толькі за першыя дні лістапада ў краіну трапілі больш за тысячу мігрантаў, якія выкарысталі Беларусь як краіну транзыту.
  • Са жніўня польскія памежнікі спынілі больш за 33 тысячы спробаў нелегальнага перасячэньня мяжы з боку Беларусі, летась іх было 88.
  • 15 лістапада больш за 3 тысячы мігрантаў сабраліся на беларускім памежным пераходзе «Брузгі» перад лініяй польскай мяжы, умацаванай часовымі загародамі і шарэнгай польскіх вайскоўцаў.
  • Па словах прэс-сакратара Лукашэнкі Натальлі Эйсмант, у Беларусі агулам каля 7 тысяч мігрантаў, якія спадзяюцца трапіць у Нямеччыну.
  • 22 лістапада ў Бэрліне адмовіліся прымаць каля 2 тысяч чалавк з Блізкага Ўсходу, якія прыбылі ў Беларусь пасьля арганізацыі рэжымам Лукашэнкі мігранцкага крызісу.
  • 18 і 22 лістапада ўрад Іраку зладзіў два эвакуацыйныя рэйсы, якія агулам вывезьлі зь Беларусі звыш 500 мігрантаў, на 25 і 26 лістапада заплянаваныя яшчэ 4 рэйсы.
  • 25 лістапада мігранты правялі акцыю пратэсту на памежжы, заяўляючы, што ня хочуць вяртацца назад у свае краіны.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

Ігар Лосік Кацярына Андрэева Дар'я Чульцова Марына Золатава Ягор Марціновіч
XS
SM
MD
LG