Лінкі ўнівэрсальнага доступу

Жонку застрэленага сілавікамі праграміста Андрэя Зельцара перавялі на абсьледаваньне ў Навінкі


Акцыя памяці Андрэя Зельцара, архіўнае фота

Марыю Ўсьпенскую зьмясьцілі ў Рэспубліканскі навукова-практычны цэнтар псыхічнага здароўя для праходжаньня псыхіятрычнай экспэртызы. Да таго яе трымалі ў менскім СІЗА № 1.

Як паведаміў у сацсетках грамадзкі актывіст Андрэй Стрыжак, упершыню пасьля арышту, які адбыўся ў канцы верасьня, для жанчыны прынялі перадачу.

«Высьветлілася, што Марыю Ўсьпенскую некалькі дзён таму перавялі з „Валадаркі“ ў Навінкі. Там зробяць псыхіятрычную экспэртызу. Упершыню за ўвесь час арышту атрымалася перадаць ёй прадметы першай неабходнасьці», — паведаміў Андрэй Стрыжак.

Па яго словах, спачатку ў ІЧУ на Акрэсьціна, а пасьля і ў СІЗА на Валадарскага адміністрацыі ўстановаў стварылі ўдаве забітага праграміста невыносныя ўмовы:

  • адключылі ацяпленьне ў камэры;
  • адмаўлялі ў прыёме перадач (харчоў, цёплых рэчаў, прадметаў гігіены)
  • беспадстаўна адмовілі ў допуску адваката.

Марыю Ўсьпенскую абвінавачваюць у саўдзеле ў забойстве супрацоўніка КДБ, які 28 верасьня падчас штурму кватэры загінуў у перастрэлцы разам з Андрэем Зельцарам.

Блізу 200 чалавек, якія асудзілі дзеяньні сілавікоў, арыштавалі за абразы службовай асобы праз камэнтары ў сацсетках, да іх не дапускаюць абаронцаў і не дазваляюць перадаць рэчы. Таксама ў гэтай справе арыштаваны журналіст Генадзь Мажэйка.

Перастрэлка Андрэя Зельцара з групай КДБ. Што вядома

28 верасьня каля другой гадзіны дня супрацоўнікі КДБ у цывільнай вопратцы ўзламалі дзьверы і ўварваліся ў кватэру, дзе быў Андрэй Зельцар і ягоная жонка Марыя Ўсьпенская.

Паводле афіцыйнай вэрсіі, Зельцар двойчы стрэліў і сьмяротна параніў аднаго з групы КДБ. Супрацоўнікі КДБ застрэлілі яго ў адказ.

Жонку, якая здымала здарэньне на тэлефон, затрымалі за дапамогу ў забойстве.

Андрэю Зельцару быў 31 год.

У 2008 годзе ён скончыў тэхнікум бізнэсу і права. З 2016-га працаваў у Epam кіраўніком групы (team lead).

Захапляўся фэхтаваньнем, бегам па прыродным рэльефе, трыятлёнам.

Вядома, што ён плаціў дзяржаўнае мыта на права паляваньня. Гэта можа значыць, што стрэльбу ён меў законна, і пра гэта было вядома адпаведным службам. Мяркуючы па фота ў інстаграме Зельцара, марка стрэльбы — «ИЖ-27».

17 жніўня 2020 году ў сваім інстаграме ён заклікаў да ўсеагульнай забастоўкі і «ісьці да канца».

Ягоная жонка Марыя Ўсьпенская працавала ў сетцы крамаў побытавай хіміі, ёй 40 гадоў. У іх ёсьць сын, які нарадзіўся ў 2012 годзе.

Андрэй Зельцар
Андрэй Зельцар

Пра загінулага супрацоўніка КДБ спачатку афіцыйна паведамілі толькі пазыўны «Нірвана». У дзень разьвітаньня зь ім, 1 верасьня, з паведамленьня БелТА стала вядома, што яго імя Дзьмітры Федасюк, ён афіцэр групы «А» КДБ. Раней гэтыя зьвесткі неафіцыйна паведаміў ByPol. Федасюку быў 31 год. У яго засталіся жонка і малое дзіцё.

Праўладныя СМІ апублікавалі відэа зь месца здарэньня каля восьмай гадзіны вечара. Яно было змантаванае з запісаў дзьвюх камэр — з боку сілавікоў і з боку Зельцара. Сілавікі патлумачылі запіс з пакою Зельцара ягоным жаданьнем «хайпануць».

Некаторыя карыстальнікі сацыяльных сетак палічылі відэа пастаноўкай. У іншых на падставе паказаных кадраў узьніклі сумненьні ў афіцыйнай вэрсіі здарэньня. Выказваліся розныя меркаваньні: і што байца КДБ маглі сьмяротна параніць свае ж, і што Зельцар страляў траўматычнымі, а не паляўнічымі, кулямі (якія, аднак, зблізку таксама маглі нанесьці сьмяротнае раненьне).

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

Ігар Лосік Кацярына Андрэева Дар'я Чульцова Марына Золатава Ягор Марціновіч
XS
SM
MD
LG